എന്റെ പാചകപരീക്ഷണങ്ങള്‍ എന്നാണു ആരംഭിച്ചത്‌?
ഓര്‍മ്മയില്ല...
ഞാനും കുഞ്ഞനുജത്തിയും കഞ്ഞീം,കറിയും വച്ച്‌ കളിച്ചിരുന്ന ആ ബാല്യകാലത്തില്‍ നിന്നും വളരെ അകലെയാവാന്‍ വഴിയില്ല. സ്ക്കൂള്‍ വിട്ടു വീട്ടില്‍ വന്നതിനു ശേഷം, അമ്മ ഓഫീസില്‍ നിന്നും വരുന്നതിനു മുന്‍പുള്ള ഇടവേളകളില്‍ എപ്പോഴോ ഒരു രസത്തിനായി തുടങ്ങിയതായിരിക്കണം.
എന്താണേലും ആ പരീക്ഷണ,നിരീക്ഷണ അനുഭവങ്ങള്‍ എന്നെ വളരെയേരെ സഹായിച്ചത്‌, ഞാന്‍ ബാഗ്ലൂരില്‍ നിന്നും പോരുന്നതിനു മുമ്പത്തെ 3 മാസവും, പിന്നെ ഞാന്‍ ചെന്നൈയില്‍ "ഒറ്റപ്പാക്കാനായി" ജീവിച്ച 2 വര്‍ഷക്കാലവും ആണു. മനസ്സിനിഷ്ടപ്പെട്ട ഭക്ഷണം കഴിക്കുന്നതിലുപരി, ചെന്നൈ നഗരത്തില്‍ ഒറ്റക്ക്‌ ജീവിക്കുന്നതിന്റെ വിരസത അകറ്റാനും സ്വയം പാചകം വളരെയേറെ സഹായിച്ചു.
അത്യാവശ്യമായി വാമഭാഗത്തെ നാട്ടില്‍ കൊണ്ടുപോയി ആക്കിയിരിക്കുന്നതിനാല്‍, എന്റെ പാചകപരീക്ഷണങ്ങള്‍ വീണ്ടും ആരംഭിക്കേണ്ടിയിരിക്കുന്നു.
കൊടികെട്ടിയ പാചകനിപുണന്മാരുടെ(നിപുണകളുടെയും) നിരവധി രസികന്‍ പാചകക്കുറിപ്പുകള്‍ ബൂലോഗത്തില്‍ നിറയെ ഉണ്ടെങ്കിലും, വെറുമൊരു നേരമ്പോക്കിനും, എന്റെ ഒരു മനസമാധാനത്തിനായും ഞാനും ചിലതെല്ലാം കുറിച്ചു നോക്കാം. കുറഞ്ഞപക്ഷം വാമഭാഗമെങ്കിലും ഓടിച്ചു നോക്കാതിരിക്കില്ല..എന്റെ വീരകൃത്യങ്ങള്‍...
സമര്‍പ്പണം: നളനു തുല്യം പാചകവൈഭവവും, "ഇന്‍സമാം ഉള്‍ഹക്കിന്റെ" ശരീരഘടനയുമുള്ള എന്റെ പ്രിയചങ്ങാതി, ബിനോയിക്ക്‌..
No comments:
Post a Comment