ഓഫീസില്‍ നിന്നും വീട്ടില്‍ എത്തിയപ്പോള്‍ സമയം 8.30. ഇത്തിരി നേരം ക്രിക്കറ്റ്‌ കാണാമെന്ന് വച്ച്‌ ടി.വി വച്ചു. "പണ്ടാരം...യെവന്മാര്‍ ഇന്‍ഡ്യക്കാരെക്കാള്‍ കഷ്ടം. നം.2 ടീം..ഫൂ..". പരശുരാമന്‍ കര്‍ണ്ണനെ ശപിച്ച പോലെയാണു ഇന്ത്യന്‍ ടീമിന്റെ കാര്യം. "ആവശ്യനേരത്ത്‌ പഠിച്ച വിദ്യ മറന്നു പോകും..".ദക്ഷിണാഫ്രിക്കയും ആ വഴിക്കു തന്നെ.
അതു പോകട്ടെ..തിന്നാന്‍ വല്ലതും ഉണ്ടാക്കാം..ഏതായാലും ബ്ലോഗില്‍ ഇടാന്‍ തീരുമാനിച്ചു കഴിഞ്ഞു. തുടക്കം മോശമാക്കേണ്ട..
"ഹരിശ്രീ ഗണപതയേ നമ:"
ആവശ്യമുള്ള സാധനങ്ങള്‍
==================
1.
ഇടത്തരം കത്തിരിക്കാ - 4 എണ്ണം - ഞെടിപ്പു കളയാതെ 4 ആയി കീറിയത്‌.
(രണ്ടാഴ്ചയായി ഫ്രിഡ്ജില്‍ ഇരുന്ന കത്തിരിക്കാ ആയതു കാരണം ഞെടിപ്പ്‌ ഉണങ്ങിപ്പോയി.)
സവാള - ഇടത്തരം - 1 എണ്ണം
തക്കാളി - ഇടത്തരം - 1 എണ്ണം
2.
വെളുത്തുള്ളീ- വലിയ അല്ലി - 3 എണ്ണം
ഇഞ്ചി - ഒരു ചെറിയ കഷ്ണം(സോറി..എന്റെ കൈയ്യില്‍ സ്റ്റോക്കില്ല)
പിരിയന്‍(കാശ്മീരി) മുളകുപൊടി - 1 ടീസ്പൂണ്(സാധാരണ മുളകുപൊടിയാണേല്‍ 1/2 ടീസ്പൂണ് മതി)
കടുക്‌ - 1/2 ടീസ്പൂണ്
ഉലുവ - 1/2 ടീസ്പൂണ്
3.
മഞ്ഞള്‍പൊടി - ഒരു നുള്ള്‌ (അടുത്തു നില്‍ക്കുന്ന ആളിനിട്ടല്ല. )
വെളുത്തുള്ളി - 2 അല്ലി- ചെറുതായി അരിഞ്ഞത്‌
വിനാഗിരി - 3 ടീസ്പൂണ് (കഴിയുന്നതും അളവു കുറയ്കുന്നതാണു ആരോഗ്യത്തിനു നല്ലത്‌)
ഉപ്പ്‌ - ആവശ്യത്തിനു
പഞ്ചസാര - ഒരു നുള്ള്‌ (കൂടി)
എണ്ണ(നല്ലെണ്ണ ഉണ്ടേല്‍ നല്ലത്‌) - ഒരു ടേബിള്‍ സ്പൂണ്‍ (എണ്ണ കഴിയുന്നതു കുറച്ചുപയോഗിക്കുന്നത്‌ ആരോഗ്യത്തിനു നല്ലത്‌..കുറയും തോറും കറിയുടെ ടേസ്റ്റ്‌ കുറയും)
4. ചപ്പാത്തിക്ക്‌
ഗോതമ്പുപൊടി - 1/2 കപ്പ്‌
ഉപ്പ്‌ - 1/2 ടീസ്പൂണ്
വെള്ളം - ആവശ്യത്തിനു
ഉണ്ടാക്കുന്ന വിധം
==============
തക്കാളി, സവാള എന്നിവ ചെറുതായി(കശകശാന്ന്..) അരിഞ്ഞു വക്കുക. ചപ്പാത്തിക്കുള്ള ഗോതമ്പ്‌ പൊടി ഒരു പാത്രത്തില്‍ എടുത്തു വക്കുക. എന്തെന്നാല്‍ ഒരേ സമയം നമ്മള്‍ കറിയും ചപ്പത്തിയും ഉണ്ടാക്കാന്‍ പോകുന്നു.ചേരുവ 2-ല്‍ പറഞ്ഞിരിക്കുന്നയെല്ലാം ഒരു മിക്സിയില്‍ ഇട്ട്‌ നന്നായി അരച്ചെടുക്കുക.കഴിയുന്നതും വെള്ളം കുറച്ചു വേണം അരക്കാന്‍.(അത്ര ഈസിയല്ല. അളവു കുറവായതു കൊണ്ട്‌ അരക്കാന്‍ പ്രയാസമായിരിക്കും..എല്ലാം നിങ്ങളുടെ യോഗം പോലെ.).
ചുവട്‌ കട്ടിയുള്ള ഒരു പാത്രത്തില്‍ അല്‍പം എണ്ണ ഒഴിച്ച്‌ സവാള ഇട്ട്‌ വഴറ്റുക. സ്റ്റൗ സിമ്മില്‍ ഇട്ട്‌ കുറഞ്ഞ തീയില്‍ വഴറ്റുക. ഇടക്കു ഒന്നു ഇളക്കിയാല്‍ മതി.കാരണം നമുക്ക്‌ വേറെ പണിയുണ്ട്‌. പാത്രത്തില്‍ വച്ചിരിക്കുന്ന ഗോതമ്പ്‌ പൊടിയില്‍ കഴിയുന്നതും കുറച്ച്‌ (1/4 അളവ്‌) വെള്ളം ഒഴിച്ചു നന്നായി കുഴക്കുക. ചെറിയ നാരങ്ങാ വലിപ്പത്തിലുള്ള ഉരുളകളാക്കി വക്കുക.
സവാളയുടെ നിറം ഇളം ബ്രൗണ്‍ ആകുമ്പോള്‍ ഒരു നുള്ള്‌ മഞ്ഞള്‍പ്പൊടി ചേര്‍ക്കുക. എന്നിട്ട്‌ അരിഞ്ഞു വച്ചിരിക്കുന്ന തക്കാളി ചേര്‍ത്ത്‌ വഴറ്റുക. (ഈ സമയം ചപ്പാത്തി പരത്തിത്തുടങ്ങാം..). തക്കാളി നന്നായി വഴറ്റിയ ശേഷം അരച്ച്‌ വച്ചിരിക്കുന്ന കൂട്ട്‌ ചേര്‍ത്ത്‌ ഇളക്കുക. എണ്ണ തെളിഞ്ഞു കഴിയുമ്പോള്‍ അരിഞ്ഞു വച്ചിരിക്കുന്ന് കത്തിരിക്കാ കൂടി ഇട്ട്‌ നന്നായി വഴറ്റുക.അതിനു ശേഷം ഒരു ടീസ്പൂണ് വിനാഗിരിയും, ആവശ്യത്തിനും ഉപ്പും വെള്ളവും ഒഴിച്ച്‌ കുറഞ്ഞ തീയില്‍ അടച്ചു വച്ച്‌ വേവിക്കുക.
കത്തിരിക്കാ വേവുന്ന സമയം കൊണ്ട്‌ പരത്തി വച്ചിരിക്കുന്ന ചപ്പാത്തി ചുട്ടെടുക്കാം. ഒരു പരന്ന
തവയില്‍ ചപ്പാത്തിയിട്ട്‌ കൂടിയ തീയില്‍ വേഗം ഇരുവശവും ചെറുതായി ഒന്നു ചൂടാക്കിയശേഷം, ഒരു ചട്ടുകത്തിന്റെയും,തവയുടെയും സഹായത്താല്‍ നേരേ തീയില്‍ വച്ച്‌ ചുട്ടെടുക്കുക.(ഒരു നിര്‍ബന്ധവുമില്ല..ഇങ്ങനെ ഉണ്ടാക്കിയാല്‍ പൂരി പോലെ പൊങ്ങി വരും..നല്ല മയവും ഉണ്ടായിരിക്കും..പക്ഷേ തീയുമായുള്ള അകലം കണ്ട്രോള്‍ ചെയ്ത്‌ കരിയാതെ നോക്കണം. ബുദ്ധിമുട്ടാണേല്‍ ചുമ്മാ തവയില്‍ വച്ച്‌ ചുട്ടെടുത്തോളൂ..)
കത്തിരിക്കാ നന്നായി വെന്തു കാണണം.അതിലേക്ക്‌ അരിഞ്ഞു വച്ചിരിക്കുന്ന വെളുത്തുള്ളിയും, ഒരു നുള്ള്‌ പഞ്ചസാരയും ചേര്‍ത്ത്‌ വാങ്ങുക. വേണമെങ്കില്‍(ആര്‍ക്ക്‌?) ഒരു ടീസ്പൂണ് വിന്നാഗിരിയും ചേര്‍ക്കാം.
കറി വിളമ്പാനുള്ള പാത്രത്തിലേക്ക്‌ മാറ്റുക
. സോറി.. അലങ്കരിക്കാനൊന്നും സമയമില്ല. തവയും, കറിപ്പാത്രവും കഴുകാനിടുക(പാത്രം കഴുക്കാണു ഏറ്റവും വിഷമമുള്ള പണി).കൃത്യം 1 മണിക്കൂറിനുള്ളില്‍ ചപ്പാത്തിയും,കറിയും തയ്യാര്‍.
പ്രത്യേക ശ്രദ്ധയ്ക്ക്‌: പ്രത്യേകിച്ച്‌ ഒരു യോഗ്യതയും ഇല്ലാത്തവര്‍ക്കും പരീക്ഷിക്കാന്‍ പറ്റിയ ഒരു പാചകവിധിയാണിത്‌. എങ്കിലും ഇതു മൂലം ഏതെങ്കിലും തരത്തില്‍ പരീക്ഷകനു ഉണ്ടാവുന്ന കഷ്ടനഷ്ടങ്ങള്‍ക്ക്‌ ഞാന്‍ ഉത്തരവാദിയല്ല!!
